يوم
عادي ممل زي غيرة من الايام ... امبارح زي النهاردة ويمكن يكون كمان زي
بكره...مفيش جديد,,,
يمكن
الجملة دي معظمنا بيقولها لنفسة لما يصحي كل يوم الصبح... لكن "هند" بقي
كانت حاجة تانية J
ظروف
حياتها حكمت عليها انها كل يوم الصبح تقول " ياتري هتخانق مع مين النهاردة
؟؟!! )) في مجتمع ما بيرحمش أي ست عايشة لوحدها "هند" كانت مضطرة تعيش
بشكل ست لكن بعقل وشخصية راجل .. في مجتمع لايعترف الا بالرجال كان لازم يكون
عندها ضوافر تقدر تدافع بيها عن نفسها .. بس ياتري هتدافع عن نفسها ضد مين ولا
مين؟؟ ضد طليقها اللي بيطلعلها زي عفريت العلبة كل شوية واللي للاسف مضطرة تتعامل
معاة
عشان دة ابو ابنها الوحيد,,ولا ضد رئيس القسم بتاعها اللي من اول ما سابت جوزها
وهوة معاملتة اتغيرت معاها لدرجة انة طلب منها انة يتجوزها عرفي !!! ولما رفضت بقي
يضايقها فشغلها وكل شوية
يفتعل
معاها مشكلة .. ولا ضد جيرانها في العمارة اللي تقريبا بيعدو عليها انفاسها
ومراقبينها في الداخلة والخارجة..وكل واحدة فيهم خايفة علي جوزها احسن تخطفة منها
زي ماتكون متجوزة مثلا توم كروز وخايفة علية يضيع منها !!! .... دة غير المواقف
الجميلة اللي بتتعرضلها من الناس اللي حواليها .. ابوها اللي مقاطعها تقريبا من
ساعة ما سابت بيتة زي مايكون كان مطلوب منها انها تستحمل غلاسة مراته وتقوللها
غلسي كمان .. زميلتها ولا صاحبتها اللي تتخطب وتخبي عليها لانها ياحرام معقدة
ونفسيتها وحشة وممكن تحسدها ع المحروس عريس الغفلة .. ومواقف كتييير تافهة او مش
تافهه حتي بس هية اتعلمت تعدي كل حاجة وتحمد ربنا علي الحاجات الحلوة اللي ربنا
اداهالها ابنها "اياد" وشغلها
اللي بدأت تنجح فية وعيادتها تشتغل نوعا ما .. اصحابها اللي ربنا عوضها بيهم عن
حاجات كتير واللي القعدة معاهم بالدنيا كلها.. اخوها اللي روحهم في بعض و دايما بيسأل عليها رغم انة
مسافر ومش فاضي ..كل دي نعم من عند ربنا بتحمدة عليها طول الوقت .. ولانها انسانة
متصالحة مع نفسها دايما مؤمنة ان ربنا لو اخد حاجة اكيد بيدي قصادها حاجة تانية
لان ربنا مش بيظلم حد وبيدي كل واحد فينا ال24 قيراط بتوعة وحقة في الدنيا كاملين
بحكمتة ومشيئتة .. مبقاش يهمها كلام الناس ولا مضايقاتهم ليها لانها مقتنعة بكل
اللي بتعملة..عشان كدة عمرها ما ندمت علي أي حاجة عملتها لانها معملتش حاجة حرام
ولا أذت حد.. فمش مطلوب منها بقي انها تعيش علي مزاج اللي حواليها....
بس
مكانتش تعرف ان القدر مخبيلها معركة جديدة
مش ع البال .........
كانت
قاعدة بتشتغل وبتكشف علي حاله وبعدين موبيلها رن ... خلصت كشف وراحت تشوف مين لقتها
ريم فاتصلت بيها...
ريم
: الو
هند
: ازيك يا رومة معلش يا قمر كان معايا حاله ومعرفتش ارد
ريم
: ولا يهمك يا حبيبتي اخبارك اية واخبار دودو ؟؟
هند
: الحمد لله ماشي الحال وحشتينا يا بنتي فينك واضح ان فية حظر تجول
ريم
: فعلا انا مخرجتش من 3 شهور من يوم عيد ميلاد ليلي
هند
: ممممممممممم دة عقاب بقي !!
ريم
: انا حامل
هند
: بجد الف مبروك يا حبيبتي ربنا يكمللك علي خير يارب
ريم
: الله يبارك فيكي . بس انا خايفة تطلع بنت برضة دة كان وليد موتني
هند
: نعم ؟؟ انا سمعت صح ولا بيتهيألي ؟؟ اية اللي بتقولية دة ياريم
هوة
وليد بية كمان هيتدخل في ارادة ربنا !! بنت اية وولد اية ؟؟ اية التخلف دة مش ممكن
بجد
ريم
: دلوقتي انا حامل في 4 شهور والمفروض الدكتور هيقوللي هجيب ولد ولا بنت ادعيلي يا
هند
انا
مرعوبة .. بجد مش عارفة اعمل اية
هند
: هاتعملي اية يعني هاتسلمي امرك لله وتجمدي بقي مش ممكن اللي انتي فية دة ياريم
اية
الرعب
والضعف دة بجد مش ممكن انا بجد مش عارفة انتي ازاي كدة,,؟؟
ريم
: تعالي معايا للدكتور انا خايفة ياهند
هند
: حاضر ياريم تحبي نروح امتي يا حبيبتي ؟؟
ريم
: بكرة ان شاء الله L
هند
: ان شاء الله . وياتري وليد عارف الموضوع دة ؟؟ اه نسيت اية السؤال الغبي اللي
بساله دة ..اكيد عارف طبعا دة انتي ناقص تستأذني
عشان تتنفسي يا بنتي
((نهاية الحلقة السادسة))
ليست هناك تعليقات:
إرسال تعليق