الحلقة الثالثه ((ريم ))
عارف
الوش اللي اول ما تبصلة تحس ان فية طيبة وحنية الدنيا كلها ؟؟ طب عارف البنت اللي كنا زمان بنشوفها في دروس
القراءة دي الهادية,, اللي صوتها تقريبا محدش بيسمعه من كتر ما هية خجولة وهادية
؟؟ لو عرفت الشخصية دي او شوفتها قبل كدة يبقي كدة انت عرفت تقريبا مين هية
"ريم " ...
شخصية مسالمة زيادة عن اللزوم عمرها ما اخدت قرار
في حياتها تقريبا .. لما نجحت في الثانوية العامة مجموعها وداها كلية الاداب اللي
هية ماختارتهاش .. ولما وصلت تانيه جامعة اتخطبت ل "وليد " ابن عمتها اللي برضة
ما اختارتهوش .. بس منقدرش نقول انها كانت زعلانة او معترضة او عاوزة أي حاجة ..
كل اللي كانت عاوزاة هوة انها تتجوز و
تعمل بيت واسرة ...
كانت شخصية "وليد" عكس شخصيتها تماما
ومختلفين 180 درجة .. "وليد" ظابط مباحث ابن لواء
يضايق جدا لو حد نده علية ومقالوش "وليد بيه
" نموذج مصغر من احمد زكي ففيلم زوجة
رجل مهم..ديكتاتور بمعني الكلمة بيعامل كل الناس اللي حوالية زي مابيعامل العسكري
المراسلة بتاعه .. صلف واستعلاء ونفخة كدابة وبيتعمد يمشي مبين "السلاح
الميري " اللي معاه .. سهل جدا نستنتج ان شخصية زي دي مينفعش معاها الا شخصية
مسالمة ومالهاش صوت زي "ريم" اللي قرر ان دي بتاعتة ولازم هيتجوزها من
وهية في اولي ثانوي وكان وقتها هوة في اخر سنة فكلية الشرطة .. هدوئها وسلبيتها
لفت نظرة ليها اكتر من جمالها اللي كان بيزيد قوي لما بتتكسف .. هوة كل اللي كان
عاوزة واحدة يعتبرها جزء من ممتلكاتة وبالظبط لقي دة فيها ..
بعد تخرجها من الكلية اتجوزو بسرعة وربنا اداهم
"ملك" اللي كان "وليد" دايما رافض وجودها لانة كان نفسه يخلف
ولد وكان طول الوقت بيعاقب "ريم" لانها خلفت بنت مش ولد !!
ولولا الملامة كان "وأد" البنت زي
ماكان كفار قريش بيعملوا ايام الجاهلية كان كاره وجود البنت لدرجة انة ماشلهاش وما
اخدهاش في حضنة زي أي اب طبيعي الا بعد ما اتولدت ب 6 شهور تقريبا علي ما تقبل
الامر الواقع !!!
وليد : حمدالله ع السلامة ياهانم .. عيد ميلاد
اية دة اللي لحد دلوقتي ؟؟
ريم : الساعة لسة 9 ياوليد ,, انت يمكن اللي رجعت
بدري النهاردة شوية
وليد : ارجع بدري ارجع متأخر المفروض ارجع الاقي
مراتي في البيت ومستنياني والاكل جاهز انا راجل
طالع عيني طول اليوم ومابصدق ارتاح ارجع الاقي
الهانم برة البيت ؟؟
ريم : سوري يا حبيبي بس انت عارف بقالك اسبوع
وقولتلي روحي انت عارف "ليلي" دي اختي وبصراحة كانو كلهم واحشيني و
مشفتهومش من زمان ..
وليد : اية دة يامدام ؟؟!! انتي بتناقشيني كمان
؟؟!! ماتيجي تاخديني قلمين بالمرة ؟؟ يظهر اني غلطان
اني سمحتلك تسيبي بيتك وتخرجي مع الاشكال دي ..
ريم : اشكال ؟؟!!
وليد : ايوة طبعا دي عالم صايعة موراهمش مسئوليات
ولا بيوت فاتحينها واحده اتطلقت وعاشت لوحدها
عشان تبقي علي حل شعرها والتانية بتلف في
المستشفيات طول اليوم والتالتة قال اية شغاله فبنك وطول النهار تضحك مع العميل
الفلاني والعلاني !! انتي تحمدي ربنا اصلا اني بسمحلك تكلميهم ويبقي فية صلة بينك
وبينهم ولو واحشينك قوي كدة يبقو يزوروكي هنا
ريم : انت عارف انهم مش هيزوروني تاني بعد ما انت قابلتهم وحش المرة اللي فاتت
وليد : احسن برضة لما تبقي تروحي تزوري خالي وطنط
يبقو يجولك هناك زي قبل الجواز ودي اول
واخر مرة اسمحلك تخرجي معاهم يا ريم . فاهمة ؟؟
ريم : حاضر فاهمة
وليد : انا جعان ياهانم اتفضلي حطي الاكل ادي
اللي بناخدة من الدلع والخروج . دي عيشة تقرف وتقصر العمر مش كفاية مستحمل قرفك
وانك مش عارفة تجيبي حتة ولد دة انتي فعلا بني أدمة لاتطاقي ..
انتي لسة واقفة بتهببي اية وبتعيطي لية دلوقتي ؟؟
ولية نكدية جتك القرف .. امشي غوري هاتي الاكل . وسكتي بنتك اللي بتزن دي مش هيبقي
صداع برة وجوة البيت .. عيشة تقرف .
تقريبا دة الحوار والكلام اللي بيتقال بينهم كل
يوم.. بس "ريم" لا بتعترض ولا بتاخد موقف ولا حتي بتتناقش مع
"وليد" ....
غير خجلها وسلبيتها هية كانت بتحبة فعلا .. دة مش
جوزها بس دة ابن عمتها اللي فتحت عينيها ع الدنيا لقت نفسها بتحبة ومش شايفة حد
غيره .. "وليد" اللي كل بنات العيله والنادي ومعارفهم كانو بيحلمو بية
وبيحسدوها علية واللي فرحت قوي انه فضلها عليهم كلهم .. صحيح عمرة ماقاللها كلمة
حلوة .. وصحيح شخصيتة اقوي منها بكتير .. بس برضة بيخاف عليها وبيغير عليها ..
سألت نفسها هوة دة حب تملك ؟؟ بس جاوبت في نفس اللحظة حتي لو كان كدة اية يعني
!!!! انا مراته وبنت خاله يعني ماليش غيره
وحتي لو مش بيحبني مش مهم كفاية عليا اكون معاه وجمبة وكفاية انة اتجوزني وفضلني
علي كل البنات التانيين !!!!!!
كان حبها لية حب غريب مليان ضعف واستسلام و
مفيهوش أي نوع من انواع الكرامه لدرجة انة احيانا كان بيخاصمها وهوة اللي غلطان
وبرضة هية اللي كانت بتروح وتصالحة ّ!!
كل اللي حواليها حذروها من ضعف شخصييتها معاه وان
كدة غلط وان مينفعش تبقي سلبية ومستسلمة كدة بس برضة مفيش فايدة مهما يعمل فيها
لابتزعل ولا بتعترض بالعكس بتعتذرله حتي لو هوة اللي غلطان ... يمكن بمشاعر الانثي
كدة حست ان ضعفها دة هوة الحاجة اللي خلت "وليد" يتجوزها ويختارها فعشان
كدة عمرها ما بتعترض ولا بتتغير !!! ولا حتي ليها راي في أي حاجة في البيت مع انها
ست البيت !!! باختصار كانو نموذج مصغر من
"سي السيد و أمينة " بس بشكل
جديد وعصري !!!!
((نهاية الحلقة الثالثة))
ليست هناك تعليقات:
إرسال تعليق