أربع بنات.."الحلقة السابعة : المواجهة "

هند : ازيك يا قمر ,, اتأخرت عليكي ؟؟

ريم : لا خالص انا اساسا بقدم رجل وبأخر رجل ربنا يستر...

هند : بجد مش عارفة اقوللك اية مش ممكن ياريم استسلامك دة  

ريم : ياهند مش كل الناس شخصيتها قوية زيك

هند : مش موضوع قوة شخصية يا ريم بجد لازم تتغيري شوية هوة كمان

هيحاسبك علي ارادة ربنا  ؟؟!!

ماعلينا احنا قدامنا كام كشف ؟؟

ريم : خلاص واحدة جوة هتتطلع وانا اللي عليا الدور :(

الممرضة : مدام ريم ,, اتفضلي

هند : يالا بينا واجمدي بقي

ريم : ربنا يستر

وطبعا حصل المتوقع وريم طلعت حامل في بنت لان ربنا مش بيحب اللي بيتحدي ارادتة وبيعترض عليها ... انهارت قدام الدكتور بعد ما بلغها اللي شافة في السونار وعيطت كتير جدا....للدرجة دي القهر ممكن يخلي الانسان بالضعف دة ؟؟  كانت عارفة اللي هيحصل وكانت عارفة ان وليد لايمكن يفهم ويقدر ان دي ارادة ربنا

وانها مالهاش ذنب فيها وكانت عارفة برضة ان محدش هيقدر يقف قصادة .. حتي ابوها اللي هوة خاله !!!!

الكل كان بيعملله حساب ...الكل كان بيخاف منة ومحدش هيقدر يدافع عنها ويحميها منة ولا هية طبعا تقدر تواجهة ولا تدافع عن نفسها ...

ريم : اعمل اية ياهند ؟؟ اتصرف معاه ازاي ؟؟

هند : هتقوليله طبعا ياريم ولازم يتقبل ارادة ربنا . هوة فية ايه ؟؟

انا مش مصدقة انة بيفكر كدة دة ولا كأنة اتعلم ولا عندة عقل !!!!

بنت اية وولد اية بدل مايحمد ربنا علي النعمة ..

ريم : وليد مش بيفكر كدة يا هند . ربنا يستر بجد دة مستحلفلي

انا مرعوبة ...

هند : قوليله ان التحكم في نوع الجنين من الراجل مش الست ودي حاجة علمية

معروفة

ريم : وهوة هيديني فرصة اتكلم اصلا ؟؟!!!!

هند : بجد مش عارفة ارد عليكي انا ضغطي علي من كلامك ياريم هوة فاكر نفسة مين يعني

؟؟ انتي مراتة مش خدامة عندة ولا جارية اشتراها ...

وليد : عملتي اية ؟؟

ريم : هجيب بنت ان شاء الله

وليد : نعم ياختي ؟؟ انا ناقص بلاوي مش كفاية البلوة اللي نايمة جوة ..

هتفضلي طول عمرك فاشلة فكل حاجة مش عارفة تجيبي حتة ولد يشيل اسمي ,,هتفضلي كدة عايشة مالكيش لازمة لية ياربي بليتني بالبلوة دي ؟؟ اعمل اية دلوقتي ؟؟

ريم : انا ذنبي اية بس . دي ارادة ربنا مش هنتدخل فيها وبعدين بيقولو بصراحة

ان الراجل هوة اللي بيحدد نوع الجنين مش الست .

وليد : سمعيني كدة قولتي اية .. هما مين دول اللي بيقولو ياروح امك ؟؟

ريم : دي ابحاث علمية وبعدين لو سمحت يا وليد متجبش سيرة ماما هية مالها بس ومال موضوعنا

وليد : دانتي عينك فتحت قوي وشكلك عاوزة قلمين يفوقوكي . بتردي عليا يا زباله يا فاشلة

ريم : بتضربني يا وليد هية وصلت لكدة .. ؟؟

وليد : واكسر دماغك واعلمك الادب عشان تعرفي تردي عليا ازااااااااي ........

لما توصل درجة الوحشية بإنسان انة يضرب مراتة وهية حامل لدرجة انها تنزف من كل حتة في جسمها

ويسيبها غرقانة في دمها وينزل .. يبقي وصل لدرجة احط الحيوانات موصلتلهاش....كل اللي قدرت ريم تعملة

انها تمسك نفسها وتوصل وتاخد تليفونها وتتصل بأهلها عشان يلحقوها .. بعدها ماحستش بالدنيا.....

 هند كان هتموت من القلق علي ريم .. وفي نفس الوقت مش هينفع تتصل بيها لانها بمجرد وصول "وليد" بية للبيت بتكون ممنوعة ترد علي تليفونها فقررت ان اول حاجة تعملها الصبح انها تتصل بيها تتطمن عليها....واخر حاجة توقعتها انها لما تتصل تتطمن تلاقيها في المستشفي وحصللها اجهاض وحالتها مش حلوة .........

هند : الو

الصوت : ايوة يا هند ازيك يا حبيبتي؟؟

هند : طنط ماجدة ؟؟ ازي حضرتك يا طنط خير اومال فين ريم ؟؟

ماجدة : احنا في المستشفي معاها يا هند . اصلها تعبت بليل وحصللها نزيف ونزلت البيبي

هند : تعبت ازاي يعني يا طنط ؟؟

ماجدة : وقعت من ع السلم !!!!!

هند : وقعت ولا وليد ضربها لما عرف انها هتجيب بنت . انا قلبي كان حاسس

قوليلي انتو فين يا طنط انا جاية حالا .

 

هند : الف سلامة عليكي يا ريم اية يا حبيبتي اللي حصل؟؟ عمل فيكي اية ؟؟

ريم : مش قولتلك مش هيسكت ضربني وبهدلني وبعدين سابني ونزل

هند : الحيوان . انتي مش لازم تسكتي . لازم تعملي محضر وتودية في ستين داهية

ولا هوة فاكر انة عشان ظابط يبقي فوق القانون

ماجدة : والنبي انتي غلبانة ياهند . محضر اية يا بنتي ؟؟ ولا حد هيقدر يعملله حاجة

هتخلص علي مفيش .. ومش بعيد يقتلها بعدها

هند : لاياطنط الدنيا مش سايبة

ماجدة : لو المحضر مشي يا هند هتخلص في النيابة . انتي مش واخدة بالك هوة مين

وابن مين ؟؟ دي بلدهم يا بنتي مش بلدنا . حسبي الله ونعم الوكيل .

هند : يعني هنسكت ياطنط ؟؟

ماجدة : خلاص يا هند لما اتسالنا علي سبب النزيف قولنا انها وقعت من السلم . والدكتور كان شاكك برضة ومش مصدق وعاوز يعمل محضر بس لما عرف هية مرات مين سكت وخاف من المشاكل .

هند : يعني اية خلاص ؟؟ هتسكتو برضة ويبقي امر واقع ؟؟ دي مينفعش تعيش معاة يوم واحد بعد كدة .

ماجدة : احنا معندناش طلاق في عيلتنا ياهند . اهو نصيبها بقي وربنا يعينها علية .

هند : الرضا بالظلم مش نصيب يا طنط . دة اختيار.. الانسان في الحاله دي مخير مش مسير .

ريم : انا مش راجعة البيت دة تاني واللي يحصل يحصل بقي

ماجدة : اعقلي يا بنتي احنا مش قدة . فوضي امرك لله وخلاص

ريم : لا ياماما انا خلاص مش قادرة استحمل . ده مش بني ادم

ماجدة : ابوكي مش هيسمح انك تسيبي بيتك وتيجي عندنا

ريم : خلاص هطلع من هنا علي بيت هند ومش عاوزة منكو حاجة . هينفع ياهند ولا هعمللك قلق؟؟

هند : قلق اية دة بيتك يا بنتي

ماجدة : جري اية يا هند هوة انتي عشان اتطلقتي عاوزة تخربي عليها ولا اية ؟؟

هند : لا ياطنط انا مش معقدة ولا تافهة عشان افكر كدة . دة قرار ريم وانا لازم اقف جمبها في الظرف دة .

ومش مشكلتي ان حضرتك شايفاني كدة... ريم انا هشوف الدكتور هيكتبلك امتي خروج وهرجعلك تاني .

ماجدة : بلاش فضايح بقي يا بنتي اعقلي كدة احنا مش قدة دة مفتري .

ريم : القوي فية اقوي منة انا خلاص تعبت من الاهانة ومبقتش قادرة اتحمل اعيش معاه .

((نهاية الحلقة السابعة))